ئایا گۆڕان و یەکێتی یەکدەگرنەوە؟ ئه‌مجاره‌ كێ فریاى گۆڕان ده‌كه‌وێت؟

ئایا گۆڕان و یەکێتی یەکدەگرنەوە؟ ئه‌مجاره‌ كێ فریاى گۆڕان ده‌كه‌وێت؟ راپۆرتى شیكارى: شاهد نعمان هه‌رچه‌نده‌ جارى پێشوو به‌چوونه‌ نێو حكومه‌ت، بزوتنه‌وه‌ى گۆڕان خۆى پاراست له‌ غه‌زه‌ب و توڕه‌یی یه‌كێتى كه‌به‌ته‌واوى له‌گرده‌كه‌ بینێژێت، به‌ڵام پێده‌چێت ئه‌مجاره‌ یه‌كێتى فریاى بكه‌وێت و نه‌هێڵێت به‌ته‌واوى بتوێته‌وه‌. ـ ئەمساڵ جیاواز لە هەموو ساڵەکانی دیکە زۆر بە گەرم و گوڕی سەرکردەکانی یەکێتی سەردانی مەزاری نەوشیروان مستەفایان کرد و لە یادی وەفاتی ناوبراودا سەرکردەکانی یەکێتی ئاماژەیان بە خاڵی لێکچوو و نزیکی نێوان هەردووکیان ده‌کردوو ، سه‌رۆكى یه‌كێتیش بافڵ تاڵەبانی به‌روون و راشكاو ئاماژەی بەوە کرد: "ئەگەر ڕێکبکەوێت حەز بە نزیکبوونەوە و تێکەڵاوبوونەوە لەگەڵ گۆڕان دەکەین" ـ ئەمە لە کاتێکدا وا دەردەکەوێت کەوا سەرکردەکانی گۆرانیش ئەم موبادەرەیان پێ باش بێت و بە گەرمی پێشوازییان لە سەرکردەکانی یەکێتی و بافڵ تاڵەبانی کرد بە تایبەت لە لایەن کوڕەکانی نەوشیروان مستەفا و ئەمە زۆر بە ڕوونی دەردەکەوێت کە پێیان باشە لەگەڵ یەکێتی نزیک ببنەوە و باشتر له‌جاران. چونکە دۆخی گۆڕان ئه‌مرۆ له‌ ئه‌ستۆى كوره‌كانى نه‌وشیروان موسته‌فادایه‌ به‌تایبه‌ت "چیا" كه‌له‌ئێستادا زۆرتر ده‌رده‌كه‌وێت و تارمایی به‌سه‌ر بزووتنه‌وه‌كه‌وه‌ دیاره‌و به‌رپرسیارێتى پاراستنى بزووتنه‌وه‌كه‌ى باوكیشى له‌ گه‌ردندایه‌. بۆیه‌ پێده‌چێت په‌نا بۆ هه‌موو رێكه‌وتن و بژارده‌یه‌ك ببات، كورد وته‌نى: پیاو كه‌وته‌ ده‌ریا ده‌ست بۆ چڵێ پوشیش ده‌بات. چونكه‌ له‌ئێستادا به‌هۆى خراپى دۆخى بزووتنه‌وه‌كه‌، پێدەچێت پێویست بە فریادڕەسێک بکات هەتاوەکو دەستی بگرێت و بەتەواوی نەتوێتەوە هەروەکو چۆن جاری پێشوو بە چوونە ناو حکومەت و دەستگرتنی لەلایەن پارتی دیموکراتی کوردستانەوە گۆڕان لە توانەوەی یەکجارەکی لە گردەکە پارێزرا. به‌ڵام پێدەچێت بۆ هەڵبژاردنەکانی ئەمجارە و وە قۆناغەکانی دواتر گۆڕان هەنگاوی دیکە و جیاواز بنێت و لەم کاتەیدا کە سەرێک نییە ببێت بە دەمڕاست و خاڵی کۆکەرەوەی هەموو گۆڕانخوازان و نه‌بوونى ڕێکخستنێکی تۆکمە، ره‌نگه‌ بە شێوازێکی دیکەو بە هەرجۆرێک بووە ته‌نانه‌ت ئەگەر به‌ چوونەوە ناو یەکێتیش بێت گرنگ ئه‌وه‌یه‌ خۆی بپارێزێت. به‌ڵام دیار نییه‌، ئایا ئه‌و ئه‌ندام و لایه‌نگرانه‌شى كه‌تاكو ئێستا له‌گه‌ڵ بزووتنه‌وه‌كه‌دا ماون، ئه‌مه‌ قبوڵ ده‌كه‌ن یان ئه‌وانیش به‌یه‌كجارى ماڵئاوایی له‌گرده‌ پیرۆزه‌كه‌یان ده‌كه‌ن..!؟